आमडदे येथे फिरते विधी न्यायालय व कायदेविषयक जनजागृती शिबिर संपन्न.

प्रतिनिधी : विवेक आर. महाले | एरंडोल

भडगाव तालुक्यातील आमडदे येथे फिरते विधी न्यायालय व कायदेविषयक जनजागृती शिबिराचे आयोजन करण्यात आले होते. विधी सेवा समिती भडगाव व वकील संघ भडगाव यांच्या संयुक्त विद्यमाने हा उपक्रम यशस्वीरीत्या पार पडला.

या कार्यक्रमाच्या अध्यक्षस्थानी भडगाव न्यायालयाच्या न्यायाधीश श्रीमती राजळे मॅडम उपस्थित होत्या. यावेळी वकील संघाचे अध्यक्ष बी. आर. पाटील, उपाध्यक्ष गणेश वेलसे तसेच निलेश तिवारी, हेमंत कुलकर्णी, बी. आर. ठाकरे, घनश्याम मोरे आदी विधीज्ञ उपस्थित होते.

फिरत्या लोक न्यायालयाचे पंच म्हणून ॲड. सचिन भोसले यांनी कामकाज पाहिले. कार्यक्रमास ग्रामपंचायत अधिकारी, अंगणवाडी सेविका तसेच ग्रामस्थांची मोठ्या संख्येने उपस्थिती होती. न्यायालयीन कर्मचारी सचिन रानडे, अनिल गोधने, दीपक पाटील व आयाज मुल्ला यांनीही आयोजनात महत्त्वाची भूमिका बजावली.

या शिबिरात उपस्थित विधीज्ञ व न्यायाधीशांनी विविध कायदेशीर तरतुदी, भारतीय संविधान तसेच महिला व बालकांशी संबंधित कायद्यांविषयी सविस्तर मार्गदर्शन केले. नागरिकांमध्ये कायद्याबाबत जागरूकता निर्माण करण्याच्या दृष्टीने हा उपक्रम अत्यंत उपयुक्त ठरला.

सदर कार्यक्रम यशस्वी होण्यासाठी विधी सेवा समिती भडगाव व वकील संघ भडगाव यांनी विशेष परिश्रम घेतले.