कारंजा तालुक्यात काजण्याची साथ; रुग्णसंख्येत वाढ, वैद्यकीय सल्ल्याची तातडीची गरज.

कारंजा (प्रतिनिधी): कारंजा तालुक्यात सध्या काजण्याच्या (चिकनपॉक्स) रुग्णसंख्येत लक्षणीय वाढ होत असल्याचे चित्र समोर येत आहे. ग्रामीण तसेच शहरी भागात या संसर्गजन्य आजाराची साथ पसरत असून काही गावांमध्ये एकाच कुटुंबातील दोन ते तीन सदस्यांना संसर्ग झाल्याची माहिती मिळाली आहे. त्यामुळे पालकांमध्ये चिंतेचे वातावरण निर्माण झाले आहे.

शाळांमधील विद्यार्थ्यांमध्येही काजण्याची लक्षणे आढळून येत असल्याने शिक्षण विभाग आणि आरोग्य विभाग सतर्क झाले आहेत. काही शाळांनी खबरदारीचा उपाय म्हणून बाधित विद्यार्थ्यांना घरी विश्रांती घेण्याचा सल्ला दिला आहे. ताप, अंगावर पाणेदार पुरळ, अंगदुखी, डोकेदुखी, अशक्तपणा ही प्रमुख लक्षणे रुग्णांमध्ये दिसून येत आहेत. विशेषतः लहान मुले आणि किशोरवयीन मुलांमध्ये संसर्गाचे प्रमाण अधिक असल्याचे वैद्यकीय सूत्रांनी सांगितले.

कामरगाव ग्रामीण रुग्णालयाचे वैद्यकीय अधीक्षक डॉ. भाऊसाहेब लहाने यांनी नागरिकांना आवाहन केले आहे की, काजणे हा संसर्गजन्य आजार असून तो हवेतील थेंबांद्वारे किंवा थेट संपर्कातून झपाट्याने पसरू शकतो. रुग्णाला किमान ७ ते १० दिवस विलगीकरणात ठेवणे, स्वच्छता राखणे, पुरळ खाजवू न देणे, स्वच्छ व सैल कपडे वापरणे आणि डॉक्टरांच्या सल्ल्यानेच औषधोपचार करणे अत्यावश्यक आहे. पुरेसा पाणीपान आणि पौष्टिक आहारही महत्त्वाचा असल्याचे त्यांनी सांगितले.

दरम्यान, काही ठिकाणी अंधश्रद्धेच्या प्रभावामुळे घरगुती उपायांवर अधिक भर दिला जात असल्याचे दिसून येत आहे. मात्र योग्य वेळी उपचार न घेतल्यास संसर्ग वाढून गुंतागुंत होण्याची शक्यता नाकारता येत नाही. त्यामुळे आरोग्य विभागाकडून गावोगावी वैद्यकीय पथके पाठवून तपासणी, औषध वितरण आणि जनजागृती मोहीम राबविण्याची मागणी नागरिकांकडून होत आहे.

तालुक्यातील प्राथमिक आरोग्य केंद्रे आणि ग्रामीण रुग्णालयांनी आवश्यक औषधसाठा उपलब्ध ठेवावा, तसेच शाळा प्रशासनाने विद्यार्थ्यांच्या आरोग्याबाबत दक्षता घ्यावी, असे आवाहन करण्यात येत आहे. नागरिकांनी अफवांवर विश्वास न ठेवता अधिकृत वैद्यकीय सल्ल्याचे पालन करावे, असेही प्रशासनाकडून सांगण्यात आले आहे.