वाशिम: प्रतिनिधी
गेल्या २० ते २५ वर्षांपासून शहरात वास्तव्यास असलेल्या ६ ते ७ गोरगरीब कुटुंबीयांची घरे वाशिम नगरपरिषद प्रशासनाने कोणतीही पूर्वसूचना न देता जेसीबी चालवून उद्ध्वस्त केली. या अमानुष कारवाईमुळे बेघर झालेल्या अन्यायग्रस्त कुटुंबीयांनी न्याय मिळवण्यासाठी सोमवार, १९ ऑक्टोबर २०२६ पासून वाशिम जिल्हाधिकारी कार्यालयासमोर बेमुदत आमरण उपोषण सुरू केले आहे. या उपोषणाला लहुजी शक्ती सेनेने अधिकृत आणि जाहीर पाठिंबा दिला आहे.
पूर्वसूचना न देता केली होती कारवाई
मिळालेल्या माहितीनुसार, वाशिम शहरातील जुन्या आयडीपी कॉलनीमधील मनीष मार्बल शेजारी ही ६ ते ७ कुटुंबे गेल्या २०-२५ वर्षांपासून राहत होती. मात्र, ६ ऑक्टोबर २०२६ रोजी स्थानिक नगरपरिषद प्रशासनाने कोणतीही पूर्वसूचना किंवा नोटीस न देता अचानक या घरांवर जेसीबी चालवला. यामध्ये या गरीब कुटुंबीयांचे संसार उघड्यावर आले असून, प्रशासनाच्या या भूमिकेविरोधात तीव्र संताप व्यक्त होत आहे.
लहुजी शक्ती सेनेचा आंदोलनात सहभाग
या अन्यायाविरोधात पीडित कुटुंबीयांनी लहुजी शक्ती सेनेच्या मदतीने स्थानिक प्रशासनाला आमरण उपोषणाचा इशारा दिला होता. त्यानुसार सोमवारपासून जिल्हाधिकारी कार्यालयाबाहेर हे आंदोलन सुरू झाले. लहुजी शक्ती सेनेच्या वाशिम टीमने उपोषणस्थळी प्रत्यक्ष भेट देऊन आंदोलकांशी संवाद साधला. "जोपर्यंत बेघर कुटुंबीयांना न्याय मिळत नाही, तोपर्यंत लहुजी शक्ती सेना त्यांच्या पाठीशी खंबीरपणे उभी राहील. पीडित कुटुंबीय जो निर्णय घेतील, त्याला आमचा पूर्ण पाठिंबा असेल आणि न्याय मिळवून देण्यासाठी संघटना रस्त्यावर उतरून संघर्ष करेल," असा शब्द लहुजी शक्ती सेनेच्या नेत्यांनी यावेळी दिला.
पदाधिकाऱ्यांची मोठी उपस्थिती
यावेळी लहुजी शक्ती सेनेचे राज्य कार्यकारिणी सदस्य सुनील दळवे, राज्य कार्यकारिणी सदस्य कैलास रणसिंगे, वाशिम जिल्हाप्रमुख मोहनराज दुतोंडे, महिला आघाडी जिल्हा अध्यक्षा विमलताई चव्हाण, जिल्हा सचिव गोपाल जोगदंड, वाशिम तालुका अध्यक्ष रवी गायकवाड आणि तालुका अध्यक्ष दीपक आवाडे यांच्यासह संघटनेचे पदाधिकारी व कार्यकर्ते मोठ्या संख्येने उपोषणस्थळी उपस्थित होते. आता या प्रकरणी जिल्हा प्रशासन काय भूमिका घेते, याकडे सर्वांचे लक्ष लागले आहे.
टिप्पणी पोस्ट करा